ARTIGO
1º
Axeitándose
ás disposicións establecidas na Lei 19/1977 sobre
o dereito de asociación sindical, do 1º de abril,
Real Decreto Lei 873/1977, do 22 de abril, e disposicións
complementarias, redáctanse os Estatutos da Asociación
Provincial de Empresarias de Pontevedra.
ARTIGO 2º
É
unha asociación interprofesional empresarial, sen ánimo
de lucro, con personalidade xurídica e plena capacidade
de obrar, en canto non lesione nin perturbe o cometido e fins
da asociación en si e dos dereitos e intereses das restantes
provincias creadas ou por crear, co mesmo nome e cós mesmos
fins, nin alterar o principio de unidade confederativa destas.
O seu ámbito abarca a provincia de Pontevedra, e representa
a totalidade dos intereses profesionais e colectivos das asociadas.
ARTIGO
3º
A
Asociación ten o seu domicilio social en Vigo na Avenida
de García Barbón, nº 104-1º. Este domicilio
poderá cambiarse cando así o acorde a Xunta Directiva.
ARTIGO 4º
A
duración da Asociación é de tempo indefinido.
ARTIGO
5º
1.
- Terá como fin primordial canto concirne á promoción
e defensa dos valores humanos, sociais e profesionais da muller
na súa condición de empresaria.
2.
- Exercerá as seguintes funcións:
a) Levar a cabo en tódolos ámbitos as iniciativas
e accións necesarias para o recoñecemento dos dereitos
da muller en canto incidan na súa actividade empresarial
e eliminar toda diferencia discriminatoria.
b) Fomenta-la formación, asistencia social, profesional
e a promoción da muller empresaria.
c) Potencia-lo espírito cooperativo estimulando a colaboración
e axuda entre as asociadas para a necesaria unidade de actuación
e esforzos.
d) Ser portavoz ante calquera clase de autoridades e organismos
dos problemas e aspiracións das súas representadas
consonte os fins da Asociación.
e) Organizar conferencias, cursos, seminarios, congresos e demais
actos de análoga natureza que fomenten o estudio de temas
económico-sociais e de producción que sexan de interese
para as asociadas e eleven o nivel de información xeral.
f) Editar revistas, boletíns e publicacións en xeral
destinados á información das asociadas e á
difusión das actividades da Asociación.
g) Establecer relacións de colaboración con entidades
oficiais e privadas, nacionais ou extranxeiras inspiradas en finalidades
similares á APE.
h) A este respecto, a Asociación, con acordo previo do
órgano de goberno competente, poderá pertencer e
solicita-lo ingreso en organizacións internacionais consonte
as disposicións en vigor.
i) Xestionar cantas propostas e iniciativas relacionadas coa súa
competencia redunden en beneficio lícito das asociadas
ou da Asociación como tal.
j) Pertencer ós grandes grupos empresariais confederados
en colaboración cos fins comúns atribuídos
ás organizacións profesionais en xeral e participar,
se é o caso, nos órganos de goberno, segundo as
disposicións establecidas.
k) En xeral, intervir, promover, defender, xestionar e seguir
con tódolos trámites, propugnar, coadxuvar en cantos
asuntos se entendan da súa competencia nas funcións
relacionadas con elas e cos fins primordiais da asociación.
ARTIGO
6º
1.-
A afiliación e baixa son voluntarias, sen prexuízo
de que quen cause baixa quede suxeita ó cumprimento das
obrigas contraídas durante o tempo da afiliación.
2.- Para contar coa condición de asociadas, para os efectos
estatutarios, considérase que teñen a condición
de empresarias:
a) As propietarias, copropietarias, socias e accionistas que exerzan
activamente a función directiva dentro da empresa.
b) As mulleres que desempeñen as xerencias das empresas
ou cargos directivos de responsabilidade e mando nas que a súa
remuneración non sexa exclusivamente salarial.
3.-
A condición de empresaria poderá acreditarse, coa
pertinente documentación, de acordo co establecido na alínea
2 deste artigo.
ARTIGO
7º
1.-
Poderán pertencer á Asociación tódalas
mulleres que, reunidos os requisitos esixidos no artigo 6º
destes estatutos, o soliciten por escrito.
2.-
A solicitude de admisión solicitarase polo correspondente
boletín, no que se manifestará reuni-los requisitos
esixidos.
3.-
A Asociación está aberta a tódalas empresarias,
recoñocéndoselles a todas elas igualdade de dereitos
e obrigas no seu seo.
4.-
Á Xunta Directiva correspóndelle examina-las solicitudes
de admisión, para comprobar se reúnen os requisitos
pertinentes.
Contra
os acordos que adopte a Xunta, sobre admisión de asociadas,
poderán interpoñerse os recursos ó caso.
ARTIGO
8º
Deixarase
de pertencer á Asociación por diferentes causas:
a) Por cesamento no exercicio da actividade profesional.
b) Inhabilitación ou suspensión declarada en sentencia
firme pola xurisdicción penal.
c) Acordo da Asemblea Xeral, por proposta da Xunta Directiva,
por non cumprir a asociada coas normas establecidas nestes estatutos
ou nos regulamentos que poidan dictarse para o seu desenvolvemento,
por non estaren ó corrente no pago das cotas ou derramas
acordadas, e, en xeral, polo incumprimento, con prexuízo
para os membros da Asociación, dos acordos desta.
ARTIGO
9º
Son
dereitos das asociadas:
a) Elixir e ser elixidas para postos de representación
e exercer cargos directivos da Asociación.
b) Exerce-la representación que se lles confira en cada
caso.
c) Intervir conforme ás normas legais e estatutarias na
xestión económica e administrativa da entidade da
que forman parte, así como nos servicios e institucións
sociais que esta manteña.
d) Informar e ser informadas oportunamente das actuacións
e vida da asociación e de tódalas cuestións
que lles afecten directa ou indirectamente.
e) Expresar libremente as súas opinións en materias
e asuntos de interese profesional e formular propostas e peticións
ós seus representantes dentro do ámbito asociativo
de acordo coas normas estatutarias e societarias.
f) Exercita-las accións e recursos que teñan lugar
en defensa dos seus dereitos asociativos e insta-la Asociación
a que interpoña accións e recursos oportunos para
a defensa dos intereses profesionais dos que teña encomendada
a súa representación.
ARTIGO
10º
Son
deberes das asociadas:
a) Participar na elección de representantes e dirixentes.
b) Cumpri-los acordos validamente adoptados pola Asociación,
estatutos e regulamentos aprobados pola Asemblea Xeral.
c) Respecta-la libre asociación, manifestación e
pareceres e non entorpecer directa ou indirectamente as actividades
propias desta.
d) Facilitar información solvente e responsable sobre as
cuestións que non teñan natureza reservada cando
lle sexan requiridas polos órganos de goberno da Asociación.
e) Contribuír ó sostemento da Asociación
conforme o acordo que para tal efecto adoptou a Asemblea Xeral
co establecemento de determinadas cotas.
f) Con notificación previa por escrito á Presidencia,
causará baixa na Asociación o membro ou membros
que renuncien a seguir practicando as actividades que motivaron
o seu encadramento, así como quen cometesen falta ou omisións,
que, para o xuízo razoable da Xunta Directiva, determinen
a súa expulsión.
ARTIGO
11º
Os órganos de goberno da Asociación son os seguintes.
a) Asemblea Xeral.
b) Xunta Directiva.
c) Presidencia.
ARTIGO
12º
1.- A Asemblea Xeral estará constituída pola totalidade
das asociadas.
2.-
As asociadas poderán ser representadas para efectos de
asistencia á Asemblea Xeral, con delegación expresa
por escrito previa, pola Presidencia ou outra persoa da Xunta
Directiva.
ARTIGO
13º
A Asemblea Xeral reunirase polo menos, unha vez ó ano en
sesión ordinaria. Con carácter extraordinario poderá
reunirse sempre que o solicite a terceira parte das súas
asociadas, ou o decida a Presidenta por instancia da Xunta Directiva.
ARTIGO
14º
Compételle
á Asemblea Xeral:
a) Aprobar e reforma-los regulamentos e normas estatutarias.
b) Adoptar acordos en relación coa representación,
xestión e defensa dos intereses peculiares das súas
asociadas, de acordo coa representación atribuída
á asociación, sen prexuízo da facultade de
delegar na Xunta Directiva a realización daqueles que se
atopen no marco da súa competencia.
c) Adoptar acordos resolutivos, e a comparecencia ante os organismos
públicos, para a interposición de toda clase de
recursos, co fin de defender en forma axeitada e eficaz os intereses
profesionais e peculiares do seu cargo.
d) Elexi-las compoñentes da Xunta Directiva, cun mandato
que será renovado cada catro anos.
e) Coñece-la xestión da Xunta Directiva.
f) Fixa-las cotas que contribúen ó sostemento da
Asociación, de acordo coas normas regulamentarias correspondentes.
Igualmente as derramas, se fosen pertinentes.
g) Aproba-los presupostos e as liquidacións de contas.
h) Acorda-la disolución da Asociación, se fose aprobada
por máis da metade das asistentes.
i) Sanciona-las faltas graves e moi graves das asociadas conforme
ás normas dictadas para o efecto. Contra os acordos da
Asemblea Xeral poderán establecerse os recursos establecidos
na normativa vixente.
Así mesmo, a Asemblea Xeral deberá aprobar, se procede,
o labor desenvolvido pola Asociación durante todo o ano
e estudia-los asuntos que, pola súa excepcional importancia,
se sometan á súaa consideración pola Xunta
Directiva, ou sexa, da súa exclusiva competencia.
Á Asemblea correspóndelle establece-las liñas
xerais que se deban seguir para que a Asociación cumpra
os fins que lle son inherentes.
ARTIGO
15º
Unha
vez constituída a Asemblea Xeral, non poderán estudiarse
máis que aquelas cuestións contidas na orde do día,
que serve de convocatoria, e os seus acordos tomaranse sempre
por maioría, resolvéndose en caso de empate mediante
voto de calidade da presidenta.
Na
orde do día incluirase sempre un epígrafe de "rogos
e preguntas", para dar ocasión a legalizar toda suxestións,
exposición ou formulación que se considere de interese.
ARTIGO
16º
A
presidenta convocará a Asemblea Xeral, sempre que sexa
posible, con quince días de antelación, polo menos,
á data fixada na reunión, con remisión da
orde do día comprensiva dos asuntos que se vaian tratar.
A convocatoria será notificada persoalmente ou, no seu
defecto, anunciarase coa antelación indicada a través
dos medios de comunicación social.
ARTIGO
17º
Para
que a Asemblea Xeral poida adoptar validamente os seus acordos,
será preciso que se atopen presentes ou representadas en
primeira convocatoria, cando menos, a metade máis unha
das súas asociadas, e, en segunda convocatoria, calquera
que sexa o número, os seus acordos adoptaranse por maioría
simple, salvo casos especiais previstos nos estatutos.
ARTIGO
18º
Das
reunións da Asemblea Xeral levantarase acta, na que se
reflictan os acordos adoptados, así como o resumo das opinións
emitidas, cando non se obteña unanimidade de criterios,
ou así o pidan os interesados.
ARTIGO
19º
DA XUNTA DIRECTIVA DA ASOCIACIÓN
A
Xunta Directiva da Asociación estará composta por:
Unha presidenta, unha vicepresidenta, unha secretaria, unha tesoureira
e cinco vocais.
Tódolos cargos directivos da Asociación serán
elixidos pola Asemblea Xeral mediante sufraxio libre, directo
e secreto entre as asociadas que o sexan cunha antigüidade
mínima dun ano, e o seu mandato será de catro anos.
ARTIGO
20º
Compételle á Xunta Directiva:
· Realizar e dirixi-las facultades da Asociación
necesarias para o exercicio e desenvolvemento das actividades
que lle son propias.
· Propoñer á Asemblea Xeral a defensa de
xeito adecuado e eficaz dos intereses profesionais ó seu
cargo.
· Propoñer á Asemblea Xeral os programas
de actuación e realizar e dirixi-los xa aprobados dando
conta a aquela do seu cumprimento.
· Velar polo cumprimento dos acordos da Asemblea Xeral.
· Decidi-la celebración de reunións extraordinarias
da Asemblea Xeral e coñece-la orde do día destas
e das ordinarias.
· Presenta-los presupostos, balances e liquidacións
das contas para a sua aprobación pola Asemblea Xeral.
· Inspecciona-la contabilidade, así como a mecánica
dos cobros e pagos, sen prexuízo das facultades atribuídas
á Tesoureira.
· Decidir en materia de cobros, ordenación de pagos
e expedición de libramentos.
· Elabora-la memoria anual de actividades someténdoa
para a súa aprobación á Asemblea Xeral.
· Inspeccionar e velar polo normal funcionamento dos servicios
da Asociación.
· Adoptar acordos relacionados coa interposición
de toda clase de recursos e accións ante calquer organismo
ou xurisdicción.
· En casos de extrema urxencia resolver provisionalmente
calquera asunto non previsto nos estatutos, a reserva de lle dar
conta á Asemblea Xeral na primeira reunión que celebre
esta.
· Establece-las asesorías, comisións ou delegacións
que se estimen precisas para o bo funcionamento da Asociación.
En
caso de empate nas votacións da Xunta Directiva, o voto
da presidenta decide o empate.
ARTIGO
21º
1.-
A Xunta Directiva da Asociación reunirase, polo menos,
en sesión ordinaria unha vez por mes.
2.-
Celebrará sesión extraordinaria:
a) Cando a convoque a presidenta.
b) Por petición da terceira parte dos membros da Xunta.
ARTIGO 22º
A
Xunta Directiva deberá convocarse, como mínimo,
con oito días de antelación á data fixada
para a primeira reunión, e a presencia da metade máis
un dos membros que a compoñen, para que poida ter lugar
a primeira convocatoria.
Se
non asistira o número necesario de membros, farase segunda
convocatoria, e, unha vez transcorrida unha hora, quedará
constituída a Xunta, calquera que sexa o número
dos presentes.
Excepcionalmente,
por razóns de urxencia, e no suposto de que se estime necesario
e conveniente, para maior rapidez e eficacia da reunión
da Xunta, poderá prescindirse de tales requisitos.
ARTIGO
23º
Dentro
do prazo dos quince días seguintes á sesión
da Xunta, facilitarase a información completa dos acordos
adoptados nela a tódalas asociadas.
ARTIGO
24º
Os
membros da Xunta Directiva veñen obrigadas a asistir a
cantas reunións sexan convocadas.
Se por enfermidade ou ausencia, un membro non pode asistir á
Xunta, pode delega-la súa representación, por escrito,
á presidenta ou a outro membro calquera da Xunta Directiva.
ARTIGO
25º
Os acordos adoptados polos órganos de goberno da Asociación
en materia da súa competencia, coas condicións e
requisitos legais establecidos, serán obrigatorios e terán
carácter vinculante para as asociadas.
ARTIGO
26º
A
Presidenta e os membros da Xunta non poderán percibir soldo
polo desempeño dos seus cargos, que serán obrigatorios
e honoríficos. Non obstante, poderán percibi-lo
importe total das súas viaxes e axudas de custo, en compensación
polos gastos que se lles ocasionen no exercicio das súas
funcións, con suxeición ás normas ou acordos
establecidos para o efecto.
ARTIGO
27º
Os membros da Xunta Directiva cesarán nos seus cargos polos
seguintes motivos:
a) Por expiración da duración do seu mandato legal.
b) Por elección ou asignación para outros cargos
nos que o seu desempeño resulte moral, legal ou practicamente
incompatible co exercido na Xunta Directiva, para o xuízo
desta.
c) Por baixa ou suspensión no exercicio da actividade que
determinase a elección.
d) Por perda de calquera das condicións de elixibilidade
regulamentaria esixible.
e) En virtude de sancións impostas como resultado de expediente,
mandado instruír, substanciado e resolto regulamentariamente.
f) Por expresa renuncia ou incapacidade material ou física.
ARTIGO
28º
DA PRESIDENTA
Son funcións da presidenta:
· Presidi- la Asemblea Xeral e a Xunta Directiva.
· Dirixi-los debates e mante-la orde de reunións
e executa-los acordos.
· Representa-la Asociación en calquera clase de
actos e contratos e outorgar poderes, con acordo previo da Xunta
Directiva.
· Ordena-los gastos e autoriza-los pagos.
· Autoriza-los xustificantes de ingreso.
· Convoca-las reunións da Asemblea Xeral e da Xunta
Directiva.
· Cumprir e facer cumpri-las disposicións legais
e normas estatutarias no que afecte á Asociación.
· Desenvolve-lo conxunto de funcións que lle sexan
atribuídas para a boa marcha da Asociación.
· Levar á práctica cantas iniciativas e funcións
considere conveniente en beneficio da Asociación e dos
seus membros.
· Someter á aprobación da Asemblea Xeral
as delegacións ou nomeamentos do persoal administrativo
que dependa da Asociación.
· Ter ó seu cargo mancomunadamente coa Tesoureira
os fondos da Asociación.
ARTIGO 29º
DA VICEPRESIDENTA
A
vicepresidenta substituirá a Presidenta por delegación,
en caso de ausencia ou imposibilidade manifesta para comparecer
esta.
Cooperará e auxiliará a xestión da Presidenta,
quen poderá confiarlla ás representacións
que considere oportunas.
ARTIGO
30º
DA SECRETARIA
Á
Secretaria Xeral lle compete leva-la correspondencia da Asociación,
redactar e asinar, co visto e prace da presidenta, as actas da
Xunta Directiva e da Asemblea Xeral, que estenderá no libro
correspondente, redactará así mesmo e asinará
cantos documentos deriven dos acordos dos órganos de goberno,
e deberá levar, nun libro para o efecto, o rexistro de
afiliadas, anotando as altas e as baixas que se produzan. Terá
o seu cargo o arquivo da Asociación e redactará,
para a súa presentación pola Xunta Directiva, a
memoria de cada exercicio, controlará o funcionamento de
cada secretaría e do persoal ó servicio da Asociación.
ARTIGO
31º
DA
TESOUREIRA
Son atribucións da tesoureira:
a) Custodia-los fondos.
b) Expedir libramentos, que someterá á firma da
Presidenta.
c) Organiza-lo servicio de cobranza de cotas e os pagos efectuados
á Confederación, asociacións internacionais
e demais gastos de coordinación e representación.
d) Expedi-los xustificantes de cobro, que someterá á
firma da Presidenta.
e) Executa-los acordos da Xunta Directiva que se refiran á
tenencia, depósito e intervención de fondos.
f) Intervir tódolos ingresos e pagos que se ordenen, organizando
a contabilidade da Asociación.
g) Realiza-los balances da situación económica da
Asociación que a Presidenta ten que someter anualmente
á Xunta Directiva, para a posterior aprobación por
parte da Asemblea Xeral.
ARTIGO
32º
O
estado de contas, que presentará anualmente a Tesoureira,
estará á disposición de calquera asociada
que o solicite formalmente para o seu coñecemento e información.
ARTIGO
33º
Se
o volume das operacións contables e económico-financeiras
da Asociación o require, a Xunta Directiva poderá
acordar desagrega-las funcións propias da tesoureira para
unha contadora, designada especificamente por persoas da Xunta
Directiva e aprobado o seu nomeamento para o cargo pola mesma
Xunta.
A contadora colaborará coa tesoureira na confección
do proxecto do presuposto de gastos e ingresos de cada exercicio
e visará o estado de contas anual.
ARTIGO
34º
DAS
VOCAIS
As
vocais, á parte da obriga que contraen de asistir a tódalas
sesións da Xunta Directiva e Asemblea Xeral, cooperarán
en tódalas actividades que lles sexan encomendadas polos
demais cargos da Xunta Directiva.
.
